Mengenai Saya

Foto Saya
sibu, sarawak, Malaysia
Nothing exciting. ~I love to make friends. ~Like to study about religion. ~I like the one that matures in speech and thought. A person who is smart and can help me to move forward. ~Want to make something that is hard to be easy. ~I just believe in One. someone will listen to our hearts.

Jumaat, 10 Jun 2011

Disiplin Roh orang Kristian


1. Jako Pemuka Pasal Disiplin Roh (Richard Foster).

Nama nya disiplin Roh?. Disiplin roh iyanya pengawa kediri tauka begulai ti dikerja kena ngerapat ka kaul diri enggau Allah Taala, awak ka Iya bisi bekerja aba kitai. Disiplin roh nyekaum pengawa macha bup kudus, besampi, nyembah Iya, bepasa, ngasi, ngako dosa enggau besyukur/beterima kasih.

Jean-Pierre de Caussade, madah “Jiwa- lempung sempama bulu, cair baka ai, enda bedosa baka anak mit- nyebut tiap saat penuh pengasih kurnia baka gelembung benung terebai”, madah ka sempama ti sempurna pasal disiplin roh.

Kitai minta roh kudus ngajar, ngiring kitai, madah pemendar iya ngagai kitai semua nya dikerja Roh Kudus dalam setiap generasi. Chunto: dalam pengidup setiap generasi, terbit mayuh bup pasal sampi, bup nya meri tafsir nuju pengidup tetentu. Bup Rosalind Rinker “Prayer Conversing with God” mayoh udah nulung orang pasal pengidup sampi.

Tuhan ngiring semua orang ti rindu ka Iya, tang Tuhan enda ngiring enggau chara ti sama. Sampi patut dikemerat dalam pengidup disiplin kitai. Enda semua orang ka bisi pengarap nemu chara berandau enggau Tuhan, tang bisi mega orang ti bisi pengarap enda nemu chara besampi. Belajar meh siti ari disiplin.

2. Nyadi ka Disiplin Roh dalam Pengidup (Howard Snyder)

Howard Snyder ngemerat ka lima chara nyadi ka disiplin dalam pengidup Roh:

  1. Bisi masa besembiang
  2. Meruan besampi
  3. Begulai gempuru enggau bala menyadi dalam Kristus lalu besembiang begulai sereta besampi.
  4. Begulai enggau sebilik dalam ngemansang ka pengidup disiplin Roh.
  5. Begempung enggau anembiak gereja ke bukai dalam sembiang begulai.

3. Penuju disiplin Roh (Richard Foster)

Penuju disiplin, awak ka kitai belajar idup begulai enggau Tuhan (John 15:14) lalu ngembuan buah-buah Roh Kudus.

Penuju disiplin mega awak ka kitai bisi Tuhan, Tuhan deka kitai ngasai idup dalam pengidup Roh lalu Iya deka nyaup pengidup Roh kitai. Disiplin Roh mega ngasuh pengidup kitai senang.

Disiplin patut dikerja enggau pengaga ti datai ari Tuhan (Heh 8:10). Pengaga ngasuh kitai kuat dalam diri kitai empu lalu meri pengelantang dalam ngereja pengawa.

Penuju disiplin mega iyanya ngaga sturkur peneleba dalam diri kitai empu, lebuh maya disiplin kitai makin kuat, mayuh pengawa disiplin ti suah dikerja kitai nyadi ka ulah kitai.

4. Bepasa (Richard Foster)

Dalam pengidup dunya, bepasa nya ketegal ka ngurang ka berat tubuh tang kebendar disiplin bepasa tu nyadi ka disiplin Roh ti tetumpu aba Tuhan. John Wesley madah “Awak pekara nya dikerja Tuhan ngena mata kitai ti mina tetumpu aba Iya, awak ka penuju enggau pekara tu mina ngemulia ka Iya”

Bepasa nyaup nangang tubuh diri lalu meransang kitai dalam sampi. Ari bepasa mega kitai ulih ngarap ka Tuhan meri pekara ti dipinta orang ti amat-amat ngiga Iya (Heb 11:6). Bepasa mesti enggau ati ti sukarela.

Bup Kudus mayuh madah pasal bepasa, antara tuai-tuai bup kudus ti bepasa iyanya Moses, David, Elijah, Ester, Daniel, Paul sereta Jesus.

Bepasa ulih meri penyaup dalam roh ti enda kala diulih ngena chara lain. Bepasa iyanya pengasih enggau berkat Allah Taala ti enda tau dilengka.

5. Kesederhanaan (Richar Foster)

Disiplin Roh ti pengubas iya(sederhana) bereti mina bisi siti penuju iyanya nuju Allah Taala. Kierkegaard madah “Penuci ati bereti ka ke siti pekara” reti iya ka ke pekara ti manah iyanya Allah Taala.

Chara idup sederhana iyanya hasil baka ti disebut Jesus “Enti mata nuan tuchi, semua tubuh nuan deka tampak” (Mat 6:22). Mata ti manah iyanya mina tetumpu aba Tuhan aja lalu Tuhan nyadi ka pusat dalam pengidup kitai.

Ari pengelaman kitai empu, ari timpoh kitai enggau Tuhan sereta enggau anembiak Iya pia mega ari bup kudus, kitai arap iyanya kesederhanaan Kristian amat beguna, setipak sereta patut dikerja. Pilipi 4:12, madah ka kitai,

6. Sampi (Howard Snyder)

Sampi iyanya chara kena kitai ngelala Tuhan. Kitai patut besampi laban:

  1. Kena berandau enggau Tuhan, ngulih pengapun sereta pengering.
  2. Kitai beguna ka saup dalam ngereja pengawa (James 1:5). Fungsi sampi iyanya ngarah pengidup kitai.
  3. Kitai patut meda bemacham pekara ari sudut pandangan Tuhan. Sampi ukai semina bejako enggau Tuhan tang ninga nyawa Iya.
  4. Besampi iyanya pekara utama. Besampi iyanya tugas gereja enggau semoa kristian. Lebuh kitai besampi Tuhan deka ngena kitai. Tuhan milih sampi jalai Iya nyalai ka tugas gereja.
  5. Bup kudus madah sampi ukai semina dikerja siko aja, tang sampi dikerja semua anembiak Tuhan. Sampi begulai ukai semina kaul enggau pangan diri tang enggau Tuhan mega (Mat 18:20).
  6. Sampi nyaup kitai, tang ukai semina deka meri pekara ti beguna kitai. Kitai besampi ngagai Tuhan, muji Iya, meri pengasih kitai ngagai Iya laban kitai nemu Iya, laban Tuhan nagga kitai awak ka kitai ngereja pengawa nya tadi.

7. Kesunyian (Richard Foster)

Kesunyian dalam disiplin suah disalah erti, sunyi ukai bereti kediri tauka tusah ati, tang bereti ngiga ketenangan awak ka ulih focus aba Tuhan.

Kitai tau merati ka Jesus, Iya milih kesunyian awak Iya ulih besekutu enggau Allah Taala. Iya ngepun ka misi iya ba padang gurun siko iya aja (Mat 4:1-11). Ari pengawa Jesus nya kitai merati, kesunyian amat penting awak ka kitai ulih focus ngagai Allah Taala.

Kitai mega patut ngatur masa awak ka kitai ulih belajar bakani chara begulai kediri enggau Tuhan lalu nya meh deka meransang pengidup kitai. Kristus deka nyaup kitai maya ngiga kesunyian, Iya deka madah enti kitai salah jalai.

8. Disiplin enggau spontanitas (Eugene Peterson)

Mayuh sekeda orang bepengarap takut ngerusak spontanitas sida. Disiplin ukai besifat spontan, tang tanda dalam spontanitas. Orang Kristian ngereja disiplin baka besampi, maca bup kudus, besembiang, bepasa, meri pemeri, semua nya ukai ketegal mode tang kitai ngereja laban kitai udah ngaga keputusan ngereja nya.

Tesk chara nemu hubungan organis antara disiplin enggau spontanitas iyanya ari pengasih. Kitai tau merati ka beza antara peneleba enggau disiplin. Peneleba datai ari ulah ti buruk (malas), tang orang ti bedisiplin iyanya orang ti rajin maca bup kudus, besampi sereta besembiang.

Pengudah kitai muai ulah buruk (malas), pengawa pengarap ti bedisiplin ti udah ditetap ka deka narit kitai ngagai dunya ti lantang lalu dia meh Allah Taala.

Orang kristian ti pintar dalam ngereja pengawa sembiang tiap ari, iyanya nyedia ka masa ti tetumpu aba Tuhan aja. Pengawa sembiang ti tenang meh sumber spontanitas.

9. Lima chara ngaga catatan harian Rohani (Howard Snyder)

1. Nulis pekara ti nyadi dalam pemansang aba pengidup

2. nulis pekara ti dirunding ti nyaup orang berunding, meda enggau ngemas diri.

3. nyaup kitai nyadi lebih kreatif

4. ngaga catatan salah siti chara berandau enggau Tuhan

5. ngaga catatan kitai besifat nyembah tauka besembiang. Maca ari bup kudus nyadi ka komen-komen tauka lalau dalam catatan harian kitai.

10. Tirani ari pekara ti tepaksa(mendesak)

Enti kitai enda ngatur diri, kitai mudah kena pekara ti disebut “tirani ari pekara ti tepaksa”.

Ngatur diri enda susah, enti kitai nulis pekara ti patut dikerja enggau nentu ka pekara ti penting. Ngereja pengawa ti penting dulu. Besampi dalam tiap kerja ti ka dikerja, sereta minta saup Allah Taala dalam ngereja pengawa. Awak ka kitai nemu ngatur diri ukai bereti nagang diri tang ngemansang ka diri sereta meri kebebasan. Kitai deka bisi mayuh masa laban kitai udah ngatur masa kitai enggau manah.

11. Penutup

Ari ringkasan tu tadi kitai udah merati ka sekeda pola pengidup kristian ti patut dikemerat ka dalam pengidup kitai kristian maya ari diatu. Awak ka kitai mansang dalam pengarap sereta ngatur pengidup disiplin kitai enggau manah nitih jalai ti betul.

Tiada ulasan:

Catat Ulasan