Mengenai Saya

Foto saya
sibu, sarawak, Malaysia
Nothing exciting. ~I love to make friends. ~Like to study about religion. ~I like the one that matures in speech and thought. A person who is smart and can help me to move forward. ~Want to make something that is hard to be easy. ~I just believe in One. someone will listen to our hearts.

Selasa, 17 Mei 2011

Sanctification




Pengudusan/Holy Life/Sanctification.

Pengudusan tauka idup kudus iyanya salam siti ari doktrin Kristian ti penting dalam ajaran pengarap Kristian. Tajapan penting tang pekara tu mar deka diperati, laban pengudusan tu endang meruan nyadi tauka benung nyadi aba tiap mensia ke udah nyambut pengelepas sereta mensia ke benung dikuduska. Aba assignment tu kitai deka mansik pasal Sanctification nitih ka penemu Bup Kudus.

1. Nama reti Pengudusan/Sanctification?.

Leka jako pengudusan dati ari leka jako Greek iyanya "hagiasmos" ti bereti “diselara” tauka ‘dipisahka” . Enti dalam jako Hebrew iya disebut "qadash" kaw-dash” ti bereti “diberesi” tauka disebut dalam jako diatu iyanya “moral”. Dalam reti leka jako Greek ‘hagiasmos” ti bereti ‘dipisahka’, nitih ajar bup kudus penampak iyanya Allah Taala enda ulih begulai tauka disengkaum enggau pemetang, nyalai iya patut dipisahka reti tu dosa enda ulih begulai enggau Allah Taala. Dalam proses pengudusan iya diselara awak ka nitih ka peneka Allah Taala.

2. Nama kebuah Pengudusan penting?

Bup Kudus madah aba 1 Peter 1:16 “Kudus, “Awak ka kita kudus laban aku endang kudus.” Nyadi tu utai ti diperintah ka Allah Taala ngagai mensia ke udah ditebus ulih darah Jesus Kristus, awak ka sida kudus. Pengudusan tu enda ulih dikereja mensia aja tang patut beguna ka pengering ari Allah Taala(1 Kor 1:30). Leka jako kudus amat penting dalam pengidup mensia, laban idup kudus ngemanah ka kaul kitai enggau Allah Taala kelebih agi dalam ngereja pengawa iya(Hebrew 12:14)[1]

3. Namanya Pengudusan?

Pengudusan iyanya pengasih Allah Taala; nengah pengasihnya orang ti arap nyadi kudus tauka tuchi sereta bulih kuasa kena ngalah ka dosa. Dikuduska bereti dituchi ka, diselara ari penyai. Dalam reti jako bukai pengudusan iyanya apabila siko orang diserah tauka nyerah diri ngagai Allah Taala nyadi piring ti idup ngagai Allah Taala lalu diak Allah Taala deka nguduska utai ka diserah kitai ngagai iya. Kerja nya dikerja Roh Kudus, Roh Kudus nguduska mensia laban Jesus Kristus bekerja nengah Roh Kudus. Orang ti arap patut nyauh ka diri ari pengingin dunya enggau dosa; nyatu ka diri aba pemati enggau pengakat Kristus sereta nyerah ka diri ngagai Allah Taala lalu Allah Taala deka nuci iya enggau Roh Kudus[2].

4. Kaitan pengudusn enggau Baptisa Roh Kudus.

Nitih ka sekeda penemu pengudusan nyadi maya timpoh udah dibaptisa. Perlu dipeda kitai leka jako baptisa lalu iya ngudan dua reti iyanya baptisa ai enggau Roh Kudus. Tiap iko mensia ke arap ke udah nyambut pengelepas tauka selamat ari Kristus diak sida deka dibaptisa ulih Roh Kudus Tuhan empu reti nya diak sida empu deka dikuduska. Laban saat nya sida endang udah nyerah ka pengidup sida ngagai Allah Taala nyadi tu meh titik permulaan pengudusan tiap iko mensia ke udah arap[3].

5. Bakani mensia dikuduska?

Setiap mensia ke udah arap ka Kristus patut diau tuchi retinya sida enda tau enda nyelara diri ari dosa, pengingin dunya enggau penyai lalu patut besatu dalam Kristus iyanya aba pemati enggau pengakat iya. Kitai dikuduska ulih Jako Allah Taala(John 17:17). Beguna amat jako Allah Taala, laban jako Allah Taala tu penuh enggau penampak ti ninjau semua pemetang ti bisi aba pengidup kitai, iya deka nyerungkai semua utai dalam pengidup kitai lalu nempa kitai nyadi mensia ti baru ti kudus. Kitai mega dikuduska ulih darah Jesus Kristus(John 1:7). Jako Tuhan ngajar kitai sereta madah ka pengidup kitai endang bedosa lalu darah Jesus Kristus nuci kitai ari dosa nya. Semua berkat enggau ajar Tuhan ngagai kitai mega dikena dalam pengudusan kitai mensia(Hebrew 12:10). Laban tiap mensia ke bebuah badas iya deka dijarau sereta “diberesi” dan iya awak ngada ka buah ke manah baru sereta lebat. Kitai dikuduska ulih pengarap tauka imam kitai(SPKR 26:18). Pengenapan pengudusan nya begantung sereta bepangai aba imam tuaka pengarap kitai[4].

6. Pengudusan enggau Keselamatan(kudus & selamat)

Beguna amat dalam kitai deka meda beda antara justification enggau sanctification tajapan bisi beda tang iya bekait rapat enggau pangan diri. Dalam keselamatan, Jesus Kristus meri pengidup iya aba kayu regang nyadi piring nebus dosa-dosa semua mensia. Darah iya nuci kitai sereta ngelepas ka kitai ari dunya pemati. Tiap orang ke arap deka dilepaska nengah utai ke udah dikerja Jesus Kristus aba regang. Setiap mensia layak nerima pengelepasnya enda ngira bansa, umor tauka status orang nya. Pengudusan nyadi belabuh ari penyelamatan tau mega disebut kitai belabuh ari ketegal penyelamatan ari Kristus, ti endul alai tiap orang arap nesal ati. Belabuh ari nya kitai nadai agi ditebus ulih darah laban Roh Kudus bekerja dalam kitai, iya deka ngambuh kitai nyadi Kudus.

7. Pengudusan dalam Ada Baru.

Ada Baru ditemu kitai saat siko-siko orang nya udah nerima keselamatan ari Kristus sereta ngako dosa iya lalu iya diau dalam dalam perintah Allah Taala, saat tu iya dikumbai kitai udah “Ada Baru”. Reti tu iyanya, iya udah datai ngagai pengidup ka baru lalu enda agi idup dalam pemetang laban Kristus udah mai iya ngagai penampak. Dalam pengidup ti baru diak pengudusan nyadi aba pengidup iya, pengudusan tu ukai bereti orang nya nadai dosa agi tang pengudusan tu siti proses dalam pengidup iya kena ngalah ka semua penguji dalam pengidup dunya iya. Iya enda agi nyadi ulun dosa tang iya deka beperang ngalah ka dosa. Dalam Ada Baru, orang nya diada ka nengah benih Allah Taala; “Barang sapa ti di-ada ka ulih Allah Taala enggai agi bedosa, laban leka pengidup ti enggi Allah Taala empu bisi dalam ati iya; lalu laban Allah Taala nya Apai iya, iya enda ulih majak bedosa.” 1 John 3:9[5].

Dalam “Ada Baru”, Allah Taala udah ngaga pengidup ka baru aba kitai mensia tau mega dikumbai mensia ti baru ti enda agi diulun dosa, tang deka ngelaban dosa sereta Allah Taala ti nyadi terabai ti nyadi pun pengering. Semua kerja ti dikerja kitai dalam proses pengudusan iyanya siti efek ari karya ti benung tauka udah dikerja Allah Taala dalam diri kitai ulih Roh Kudus iya[6].

8. Pengudusan sebuah Proses yang berlanjutan.

Pengudusan ukai bereti badu dalam penyelamatan, tang iya lebih agi dalam proses dalam penyelamatan nya aba pengidup orang Kristian. Pekara ti perlu diperhatikan kitai iyanya, kitai sama nemu Jesus mati nebus dosa kitai, ukai bereti dosa nya nadai agi tang dosa nya enda bekuasa aba kitai. Retinya kitai diatu benung belaban enggau dunya lama kitai iyanya dosa kitai sebedau kitai diada ka baru, nyadi tu mega dikumbai kitai sesuatu yang baru pengudah kitai nemu sereta ngelala dosa nya endang enda dikerindu ka Allah Taala lalu kitai deka terus ngelaban nya. Nyalai tu disebut kitai sebagai proses dalam keselamatan. Paul terang madah pasal tu aba Galatia 5:17 “Laban utai ti dikedeka orang ti nitih ka gaya pengidup mensia ti bedosa ngelaban peneka Roh Kudus, lalu utai ti dikedeka Roh Kudus ngelaban peneka gaya pengidup mensia ti bedosa. Utai dua bengkah nya bemunsoh enggau pangan, reti nya kita enda tau ngereja utai nunda ka peneka diri.” Dalam hal tu, ati kitai deka ngereja pekara ka paling dikerindu ka Allah Taala, tang tubuh kitai lemi dalam ngereja pekara nya. Pengudusan tu digambar ka kitai sebagai pemulihan rohani pengidup roh kitai ti dikerja ulih Roh Kudus. Saat kitai udah nerima Kristus, Roh Kudus datai dalam pengidup kitai ti mai kitai ngagai proses perubahan ti disebut kitai “pengudusan progresif”, iya ngajar kitai pekara ti patut diubah dalam pengidup kitai awak ka kitai idup kudus. Ambi ka chunto; nyaka kitai suah salah dalam pengarap kitai, pengidup kitai sereta chara ulah kitai, tang Allah Taala ulih Roh Kudus iya deka bekerja aba kitai mai kitai pansut ari endul ke tusah nya. Kadang-kadang kitai ngasai ka proses pengudusan Tuhan tu pedis, tang ujung iya kitai deka ngasai ka penyamai pengudah kitai suman ari penyakit nya. Tu meh proses pengudusan aba tiap pengidup orang ke arap. Tajapan proses tu bersifat peribadi, tang penuju aba pengujung iya deka ngelari ka kitai ari dosa tauka deka miah ka kitai ari dosa ngagai pengidup ti kudus aba rohani kitai[7].


9. Hasil ari Pengudusan.

Orang ti dikuduska deka nukar tauka badu agi berunding ka utai di dunya tu tang semina nitih pikir enggau runding Jesus Kristus aja. Iya mega enda nitih ka pengingin dunya tu kelebih agi aba reta tengkira tauka duit laban iya deka nemu Kristus meh ti reta ti lebih agi berega dalam pengidup iya. Ambi ka chunto aba bansa kitai iban dulu kelia, sida mina nyembah petara leboh maya beguna aja sereta setaun sekali aja. Pengudah nyadi orang Kristian sida agi mengkang nyebah Allah Taala baka sida nyebah petara ngapa sida kelia. Semina nengah pengudusan sida deka suah agi datai ngagai Allah Taala, laban proses ari pengudusan tu ngajar tiap orang Kristian patut ngereja semua utai ke diajar ari Bup Kudus kelebih agi ngasi ka jako Allah Taala.

Tiap ati orang kea rap orang ti udah dikuduska, sida dipeda nyelai agi ari orang bukai kelebih agi dalam chara pendiau ti penuh mandang ka pengerindu sesama mensia(Kol 4:6), pia mega ngagai Allah Taala, datai ka sida mina manggai ka semua pekara ngagai Allah Taala kelebih agi pengidup sida, datai ka sida deka nyebut; “Tang nunda ka peneka nuan, ukai nunda ka peneka aku.” Luke 22:24.

10. Penutop

Pengudusan ditemu kitai ukai dalam reti kitai tuchi nadai dosa laban mensia enda ulih lari ari dosa; “Enti kitai bejako ngumbai diri nadai penyalah, kitai ngelakar diri empu, lalu nadai pengamat ba kitai.” 1 John 1:3. Pengudusan tu ngajar kitai Kristian awak ka kitai datai ngagai pengidup ke sempena(sempurna) dalam kaul kitai ti nangi sereta ngasi ka Allah Taala(2 Kor 7:1). Pengudusan tu mega ngajar kitai awak ka kitai meruan kering ngelaban kuasa dosa dalam pengidup kitai, laban dalam pengudusan tu Roh Kudus bekereja dalam kitai. Amin.



[1] J. Wesley Brill, “Dasar yang Teguh”, (Sabah & Sarawak: Sidang Injil Borneo, 1989) 230.

[2] J. Wesley Brill, “Dasar yang Teguh”, (Sabah & Sarawak: Sidang Injil Borneo, 1989) 232.

[3] J. Wesley Brill, “Dasar yang Teguh”, (Sabah & Sarawak: Sidang Injil Borneo, 1989) 230.

[4] J. Wesley Brill, “Dasar yang Teguh”, (Sabah & Sarawak: Sidang Injil Borneo, 1989) 236.

[5] G. I. Williamson, “Pengakuan Iman Westminster”, (Momentum Christian Literature, 2006),174.

[6] G. I. Williamson, “Pengakuan Iman Westminster”, (Momentum Christian Literature, 2006), 176.

[7] http://www.allaboutfollowingjesus.org/sanctification.htm.

Tiada ulasan:

Catat Ulasan